الفنان الممثل الأمازيغي إبراهيم حماتة
موقع إموريك | IMorig.com
قليل لي كايعرفو الجمهور على هذ السيد.. من غير أنه فنان مقبول يتقن أدواره.. داك الأب المتسلط مرة وداك الأب الحنون والعاقل مرة أخرى.. ولا فقيه ديال المسجد المحترم والموقر أو شيخ القبيلة.. نتقربو شوية من حياة دابراهيم حماتة..
تزاد دا براهيم حماتة سنة 1948 بضواحي مركش وبالضبط بمنطقة الحوز ولكن أصول أجداده تعود لمنطقة تاليوين ضواحي تارودانت.. بدا الدراسة ديالو فالمسجد بحكم أن الواليد ديالو فقيه ومن بعد تحول للمدرسة الفرنسية.. غدر الدراسة والتحق بالخدمة العسكرية.. دوز 12 سنة فالخدمة العسكرية ومن بعد دار التقاعد نسبي وتفرغ للفن.. أسس مجموعة غنائية فالسبعينات واستطع إجول بها جميع بقاع الوطن من الجنوب للشمال للريف لسوس.. ومن بعد سجل أول ألبوم غنائي ديالو.. استطع بالفن الأمازيغي إزور أربعة ديال القارات الأوروپية والأسيوية والأمريكية وإفريقيا أي ما يقارب شي عشرون دولة..
سنة 1995 عاد غا يلتحق بالميدان ديال السينما وكان أول فيلم لعب فيه هو تافقيرت د إبليس لي دار ليه الإخراج الفنان إبراهيم الحنوضي.. وراء هذ الفيلم غادي تقطع الصلة ديالو بالسينما.. حتى سنة 2004 غادي يلعب دور الحاج براهيم في فيلم " أرگاز ن كراط تمغارين" هذ الفيلم لي عطاه شهرة واسعة وخلا مخرجين وشركات إنتاج أخرى يعرفوه حيث قبل منو كان عندو عمل واحد.. ومكانش غادي يلعب فيه دور البطولة أي زوج تلاثة نساء كان غادي إلعب دور صغير فقط .. ولكن ملي عطاه المخرج وصاحب شركة الإنتاج السيناريو د يالالعمل لقاو أن السيد عندو طاقة وموهبة يقدر إلعب دور البطولة وذلك ما ما كان أتقن الدور وعطاه العمل دفعة قوية..
دا براهيم وصل الآن فالمسار الفني السينمائي لما يزيد عن 80 عمل.. سينما وتلفازة وأفلام.. وكايقول أن المشكل فالميدان السينمائي الأمازيغي مكايتعطاوش الأدوار بالكفاءة كايتعطاو إذا كنتي صاحب المخرج أو مول الشركة ديال الإنتاج.. وأن وقت Vcd أحسن بكثير من هذا الوقت كنا كانخدمو على طول السنة.. دابا كانتسناو عمل واحد فالسنة وتقدر تخدم فيه تقدر ماتخدمش.. فئة أخرى من الجمهور كاتعرف دابراهيم ففن الحلقة بساحة جامع الفناء.. وقلت ليه أنه كاين لي كايعاتب الفنان لي كايدير الحلقة.. أجابني أنا فعمري دابا 72 سنة أب لأربعة أبناء وعندي 15 حفيد ماخاصني حتى خير فن الحلقة كانمارسو حيث فيه كبرت وعمري كانشوف الحلقة عيب حيث هي أم جميع الفنون وهي الأصل.. وإذا باقي كانمارسها وكانقبل بأدوار صغيرة فأعمال فنية كبيرة حيث الفن كايجري ليا فدمي وكانلقى فيه راحتي وباش مايتنساش الوجه ديالي .
سولت دا براهيم كيفاش دوز هذ الفترة ديال جائحة كورونا.. واش كاينة شي إلتفاتة من شي جهة حكومية أو شيء من هذ القبيل.. قاليا لا. مكتب حقوق المؤلف هو لي صيفط ليا شي بركة ومبادرة الفنان السوسي لي كايشرف عليها المخرج عبد العزيز أوالسايح والفنان حمو اونامير والفنان حسن عليوي وأخرين. هما لي صيفطو ليا شي بركة وكانشكرهم وكانحييهم بالمناسبة .. وواحد السيد محب ليا.. أما وزارة الثقافة أو المركز السينمائي أو الإطارات النقابية بحالي بحال گاع الفنانين ماشفنا والو ولكن الرزق ما خاطيناش والحمد لله والله إرفع علينا هذ البلاء وعلى الإنسانية جمعاء.
جمال الحور